البوست ده عن اللقاء الجميل بتاع الثلاثاء الي فات بس قبل ما أتكلم عن اللقاء كنت عايز ارد علي تعليقات الموضوع الي فات (ثقافة الأوتوستوب) انا اتعمدت اني اتأخر في الرد علي التعليقات كنت عايز كل واحد يعبر عن رأيه بدون تأثيرات والي لاحظته إن كل أو معظم الناس خايفة مع أني نوهت عن مشاكل فكرة الأوتوستوب بس برده الناس خايفة من السرقة ومن القتل ومن الخطف
وهو مين ضامن انه لاقدر الله ميحصلوش حاجة وهو راكب مواصلات أو وهو ماشي في الشارع او حتي وهو قاعد في بيته
يبقي العيب من الناس من البشر الي هو إحنا مش في الأوتوستوب العيب من الخوف الي جوانا وعلشان كده بقول للخوف تبا لك
----------------------
الثلاثاء الي فات
--------------
حصل ايه الثلاثاء الي فات 24/3/2009 مش فاكر لأ افتكرت حبه اهه الحق اقول بسرعة قبل ما انسي الحبه دول كمان كان فيه لقاء لمدونيين القاهرة وإسكندرية في إسكندرية في نادي الأطباء والدعوة كانت عامة والي عايز يعرف حكايه اللقاء جه ازاي يدوس هنا المهم الي عرفت انهم هيسافروا من القاهرة كان(فاطيمة ....روح قلب ماما ) و(أستاذ خالد ..... همس الأحباب )والعبد لله والحمد لله وصلت الفجر ميدان عبد المنعم رياض وبسأل الراجل الي في الكشك الي قدام هيلتون رمسيس فين اتوبيسات إسكندرية قالي قدام شويه وقام قايلي بس نصيحة روح اركب من الترجمان احسن مشيت قدام شويه وانا بقول شكله عايز يشتغلني واستنيت شويه وجه أستاذ خالد وكان قدام شويه واقفة فاطيمة ومعاها ماجد أخوها واتعرفنا كلنا علي بعض وقبل الأتوبيس مايتحرك بشويه ماجد مشي واحنا ركبنا الأتوبيس ودي اول مرة أسافر إسكندرية بألأتوبيس ونصيحة محدش يسافر إسكندرية بألأتوبيس ده ابدا وتبقي تسمع كلام الراجل الي واقف في الكشك وتركب من الترجمان او تركب القطر او حتي الميكروباص ارحم بس الحمد لله علي كل شئ ووصلنا إسكندرية علي الساعة 9.30 تقريبا وعلطول علي نادي الأطباء قعدنا شويه نستني مدونيين أسكندرية وأول واحدة جت (هنودة .....غربة)وبعد لحظات جت (شيمو القمر) وبعديها بشوية جت (حنين القلب) وبعديها بشويات كتييييير جت الدكتورة (لماضة)الي مفروض انها هتدخلنا النادي وبعد مادخلنا النادي بدأ ييجي مدونيين كتير مش فاكر مين جه قبل مين بصراحة والي جم هم (رياح الحنين)(حروف)(نبض إسكندرية)( ماى كورنور )(أحمد ...أسير الجراح)(عاشقة الرومانسية ...... نبضات قلب ولهان) (يارب ماكونش ناسي حد) قعدنا في النادي لحد الساعة 1 الظهر وسيبتهم وقمت عملت زيارة عائلية في السريع وأنا في الزيارة جالي تليفون من أستاذ خالد إنهم هيمشوا من النادي وهيروحوا قلعة قايتباي خلصت الزيارة الحمد لله ورحت علي هناك وقعدنا للساعة 6 وقلنا نمشي بقي علشان لسة ورانا سفر بس قبل ما نمشي علطول جت المدونة ( زمردة)ومشينا وبصراحة الناس كانوا ماسكين فينا مش عايزينا نمشي وقاموا معانا بالواجب وزيادة وكان ناقص ييجوا يوصلونا لحد القاهرة وركبنا الميكروباص من محطة مصر وكعادة الميكروباص لا تشعر معه بالطريق فبمجرد ان تركب ويتحرك بك الميكروباص حتي تجد السائق يقول لك حمد الله علي السلامة يا بهوات وصلنا وينور نور الصالون علشان الناس تلم الأجرة من بعضها وتلاقي كل واحد بيصحي الي جنبه وكل واحد قايم يحرك شنطته بيطمئن عليها والحمد لله دفعنا الأجرة وكل واحد روّح بيته بالسلامة ------------------
طرائف ومواقف مضحكة في اللقاء
-----------------------------
مناكفة استاذ خالد همس الأحباب وحنين القلب لبعضهم عاملة زي مناكفة الأطفال او كارتون القط والفار مناكفة بسيطة ومتزعلش حد من التاني
واحنا في النادي فجأة لقينا العُقد بتاع عاشقة الرومانسية أتقطع لوحده والخرز نزل كله علي الأرض والشاطر يلمه بقي بس بصراحة البنات عرضوا عليها يلموه من الأرض بس هي رفضت والموقف ده فكرني بفيلم رصيف نمرة خمسة لفريد شوقي وزكي رستم لما سبحة زكي رستم اتقطعت وهو بيقتل الست الخرصه وجه فريد شوقي الي كان طالع بأسم الشاويش خميس دخل الجامع وسأل زكي رستم فين سبحتك يا معلم وزكي قاله شكلي نسيتها في البيت قام الشاويش خميس قاله انا لمتهالك يا معلم
.
بعد موضوع العقد مفيش بنصف دقيقة الجارسون بيصب كباية كاكاو هُب الكبايه فرقعت وكل الي فيها إندلق علي مين لو إنتوا شاطرين طبعا علي عاشقة الرومانسية ماشاء الله محظوظة قوي والي يسبت إنها محظوظة إنها كانت لابسة بدي أبيض بس بقي شكله حلو وهو نصفه ابيض ونصفة بالكاكاو
------------------------
إنطباعات شخصية
--------------
طبعا مش هقدر أحدد شخصية كل واحد من لقاء مدته لا تزيد عن 8ساعات بس ممكن اقول الي لاحظته والي كان واضح ومينفعش حد يخبيه ويارب ميطلعش إنطباعي غلط
فاطيمة----من المدونة بتاعتك ومتابعتي ليها كنت فاكر اني هقابل واحدة نسيت الفرحة والضحك بس الحمد لله طِّلعت واخد فكرة غلط
أستاذ خالد----بيحب يشيل المسؤليه وزي ما (أعترافات قلب) قالت أب اللقاء وقلب الشباب وهي تقصد أب اللقاء بتحمله للمسؤليه مش بسنه لأنه لسه شباب
هنودة في الغربة --------أكثر واحده قدرت اتخيلها من مدونتها صورة طبق الأصل من الي كنت ببقي متخيله وانا قاعد بتابع مدونتها واكثر شئ بيميزها ابتسامتها الي مبتفارقهاش
حروف-------طلعت اصغر من الي كنت متخيله طلعت بتدرس في الكليه من مواضيعها في المدونة اعتقدت ان ده كلام واحدة مخلصة الجامعة وبتشتغل في الصحافة من 3 سنين وشهرين بس كانت مفاجئة ان هي لسة في الجامعة هي صحيح صغيرة بس عقلها سابق سنها وعندها شقاوة الأطفال
لماضة---------شخصية ظريفة جدا ودمها خفيف جدا جدا واحسن حاجة عملتها انها دخلت كليه طب واتخرجت منها يعني نقدر نقول البلد كسبت دكتورة نشيطة وبتحب شغلها وبتخاف ربنا في المرضي بتوعها
اعترافات قلب أو شيمو القمر ----------بتحب اللغة العربية جدا وبتخاف عليها وبتزعل لما تلاقي حد بيغلط فيها وبالمناسبة دي كنت عايز اعرف يعني ايه شيمو
عاشقة الرومانسية--------مش عارف ليه فكرتني بجيهان السادات
احمد اسير الجراح---------مطلعش اسير الجراح ولا حاجة ده طلع في الجيش يعني ممكن هو الي يأسُر الجراح
-
باقي المدونيين الي كانوا في اللقاء إن شاء الله في المرات الجاية نتعرف علي بعض اكثر واكن لهم كل المودة والأحترام
---------------------------
بعض الصور من اللقاء
---------------------
دي صورة في نادي الأطباء والشمس لسه بتطلع وانا مش نايم من اليوم الي قبله
ودي صورة البحر من داخل النادي برده
ودي صورة في قلعة قايتباي ومصورلكوا بتاع غزل البنات كمان بس الي يأخذ كيس يسيب ثمنه للراجل الغلبان 
ودي صورة البحر من امام قلعة قايتباي
------------------
ناس كنت اتمني يكونو معانا في اللقاء
------------------------
سوووو---عجوز ..وعندي 30سنة
أحمد الصباغ---- خالو أحمد الصباغ
----------------------------------
الناس الي كتبت عن اليوم ده بطريقتهم
----------------------------------
------------------
هشام توفيق
-------------------
الي لقاء أجمل إن شاء الله
--------------------
علي حد علمي الموضوع ده عندهم في الطرق السريعة مش عارف بصراحة ايه النظام داخل البلد بس تقريبا مش موجود داخل البلد لو فيه حد سافر بره فتره ممكن يفيدنا في الموضوع ده 
هيحصل ايه لو وانا مسافر اسكندرية وقفت بعد بوابة الكارته وشاورت لأي عربية رايحة في اتجاه اسكندرية